МУБИС нь өндөр мэргэжилтэй багшлах боловсон хүчин бэлтгэдэг төдийгүй Монгол улсын эрдэм судлалын томоохон төв юм. Тус сургуулийн эрдэмтэн багш нарын дотор зөвхөн өөрийн орон төдийгүй, олон улсын хэмжээний нэр хүндтэй эрдэмтэд олон бий. Эрдэм шинжилгээний ажил нь бие даасан судалгаа хийх, эрдмийн зэрэг горилсон диссертаци бичих, дотоодын болон олон улсын төсөлд оролцох зэрэг хэлбэрээр хэрэгжихээс гадна мэргэжлийн их семинар, эрдэм шинжилгээний хурлыг тогтмол зохион явуулдаг. Сүүлийн 5 жилийн дотор тус сургуулийн багш нар нэг сэдэвт зохиол 120 гаруй, их дээд сургуулийн сурах бичиг 70 орчмыг бичиж нийтлүүлж, 50 шахам багш докторын болон дэд докторын зэрэг хамгаалжээ. Одоо тус сургуульд хэл шинжлэл, түүх, гүн ухаан, математик, физик, хими, биологи, сурган хүмүүжүүлэх ухаан, урлаг судлал зэрэг шинжлэх ухааны 10 гаруй салбараар докторын зэрэг хамгаалуулж байна.   
Тус их сургууль нь  Боловсрол судлал, Монгол судлал зэргийг гол тэргүүлэх чиглэлээ болгон ажиллаж, эрдэм шинжилгээний ажлыг хөгжүүлэх хөтөлбөрийг дэвшүүлэн хэрэгжүүлж байна. Судалгаа-боловсруулалтын ажлыг багаар хийхэд ахиц дэвшил гарч байна.