Тус сургууль нь өнөөдөр хичээлийн 7, оюутны 5 байр, нийт 660 гаруй профессор багш, ажилтан, ажилчидтай, 10,000 гаруй оюутан суралцагчтай байна. МУБИС-ийн одоогийн байдлаар 13,7 тэрбум орчим төгрөгийн үндсэн хөрөнгө, 2,2 тэрбум гаруй төгрөгийн эргэлтийн хөрөнгөтэй, 8,5 тэрбум гаруй төгрөгийн эргэлттэйгээр үйл ажиллагаагаа явуулж байна.
Сургалтын материаллаг бааз, тоног төхөөрөмжийн хангамж жилээс жилд өсөн нэмэгдсээр байна. Эдүгээ 513000 кв.м талбай бүхий хичээлийн 7 байранд 40 гаруй лаборатори, кабинет, арваад урлагийн өрөө, спортын 6 танхимд сургалт явуулж байна.
Сүүлийн 3 жилийн дотор компьютерийн хангамжийг 5 дахин нэмэгдүүлж суралцагч тутамд 1 компьютер ногдох болсон ба одоо компьютер сургалтын 10 гаруй лабораторитой, бүх байрыг интернэтийн сүлжээнд холбосноос гадна гадаад хэлний сургалтанд зориулсан лингофоны кабинет, оюутнуудын бие даасан үйл ажиллагаанд зориулсан интернэт кафег хичээлийн болон оюутны бүх байранд ажиллуулж байнa.

Суралцагчдыг сургалтын таатай орчноор хангаж, үйлчилгээг сайжруулах, тэдний эрүүл мэнд, гоо сайхны боловсролыг дээшлүүлэх, би бялдарыг хөгжүүлэх, ахуйн соёлын нөхцлийг сайжруулах, чөлөөт цагаа үр ашигтай өнгөрөөх боломж бүрдүүлэхийн тулд биеийн тамирын тэмцээн, спорт тоглоом, секц дугуйлан, урлаг уран сайхны үзлэг зэргийг зохион байгуулдгаас гадна, нөхөн үржихүйн төв, интернет кафе зэргийг шинээр байгууллаа. Хөдөө орон нутгаас ирсэн оюутнуудыг амьдарч, сурах нөхцөлөөр хангахын тулд 1400 гаруй ортой оюутны 5 байраар үйлчилж байна.